2021 私心推介

一年又過去，2021年香港又誕生咗唔少好歌

小編花咗啲時間回想返舊年自己最鐘意嘅歌，結果...

多到數唔曬呀🙈

所以事不宜遲，即刻嚟睇吓啦😆！

-

狂人日記 - Jer 柳應廷 

「貪生 貪了生不記得厭舊」

呢一首歌，我會形容為藝術品

由Jer嘅唱腔，到MV入面嘅演譯，都淋漓盡致咁表現咗「狂人」嘅特質。

而我喺呢首歌入面最欣賞嘅係小克老師嘅詞。尤其係「披起鑽飾如露西橫越天幕」一句，好似估謎語咁，要通過推敲先知佢嘅深層意思 。一句看似同歌曲主題完全唔相關嘅歌詞，其實正正呼應咗「狂人」。

-

純孩兒 - per se

「純孩兒 放手去通通犯錯」

人越大，越發覺自己經常戴住假面具示人，想除低嘅時候，先知道自己已經習慣咗被面具保護住。

聽過per se嘅，都知道佢地嘅歌係好有風格，同埋有好高嘅辨識度。例如係好華麗嘅前奏，又或者係Stephen同Sandy嘅聲音，令人一聽就知係per se嘅歌。

究竟人可唔可以將自己嘅面具除低，純粹咁，好似小朋友一樣，以自己嘅本性示人？

-

沙門 - 陳蕾 

「萬事請寬恕些 看淡些 情緒代謝」

「沙門」一詞，其實係印度宗教中「修行者」嘅意思。

每個人對事嘅方式都唔相同，但係一味對身邊嘅事情抱怨、否決，絕對唔係一個適當嘅方法。

與其將不滿無限放大，倒不如睇開啲，用感恩、慈悲嘅心去對待周遭嘅環境，或者會有啲新嘅睇法呢？